Tuesday, May 5, 2009

മണ്ണ് മാന്തി യന്ത്രങ്ങള്‍ ഉറക്കങ്ങളെ എങ്ങനെ മുറിക്കുന്നുവെന്ന്..!!


മണ്ണ് മാന്തി യന്ത്രങ്ങള്‍
ഉറക്കങ്ങളെ
എങ്ങനെ മുറിക്കുന്നുവെന്ന്..

ഇരുട്ടിന്‍റെ കൂര്‍ത്ത നഖങ്ങളായി
എത്ര വേഗമാണ്
കാലത്തെ അവ
മാന്തിയെടുക്കുന്നത്...

കുഴിച്ചു മൂടിയ
കാലടികള്‍, ചുംബനം, നിശ്വാസങ്ങള്‍...
എത്ര പെട്ടെന്നാണ്
മേല്‍ത്തട്ടിലേക്ക്
വലിച്ചിടുന്നത്...!!

നിന്‍റെ നഖങ്ങള്‍ക്ക്
എന്തൊരു മൂര്‍ച്ചയാണ്?
നനഞ്ഞ ഭൂഗര്‍ഭ രഹസ്യങ്ങളെ
എത്ര എളുപ്പത്തിലാണ്
തിരക്കുകളുടെ
വിയര്‍ത്ത മാറിടത്തിലേക്ക്‌
അവ ഒഴുക്കിക്കളയുന്നത്..?!

(വി ) സ്മൃതിയുടെ
ശവപ്പറമ്പില്‍
മുഖം മറച്ച ഈ ഇരിപ്പ്...
ഹോ...!!

(എനിക്കൊന്നും പറയാന്‍ ഇല്ലെങ്കിലും
നീണ്ട മുരള്‍ച്ചകള്‍ കൊണ്ട്
മണ്ണ് മാന്തി യന്ത്രങ്ങള്‍
എന്‍റെ ഉറക്കത്തെ
മുറിച്ച്....!!)

No comments:

Post a Comment